طريقة عمل كفتة اللحم بالبرغل

كلنا عارفين الكفتة طبعا ,

منها أنواع كتيرة وطرق تحضير أكتر ..

النهاردة هنعرف طريقة تحضير كفتة اللحمة بالبرغل مع المقادير ..

مكونات كفتة اللحم بالبرغل : 

اضغط على الصورة للتكبير ومشاهدتها بالحجم
الكامل

نصف كيلو لحم أحمر خالٍ من الدهون،

نصف كباية برغل،

بصلة واحدة مبشورة،

كزبرة خضراء،

فلفل أخضر،

فصين ثوم،

ملح، فلفل أسود، بهارات خاصة باللحم وكمان زعتر.

طريقة تحضير كفتة اللحم بالبرغل :

نقوم بوضع البرغل لمدة نصف ساعة قبل الاستخدام فى الماء، ثم نضع اللحم فى إناء التحضير وعليه البرغل بعد تصفيته من الماء جيدا، والبصل المبشور، الكزبرة الخضراء والفلفل الأسود والبهارات والزعتر، ونقوم بخلط المكونات جميعا جيدا حتى تتجانس مع بعضها ويفضل أن نتركها فى الثلاجة نصف ساعة قبل الاستخدام.

ثم نخرجه ونقوم بتشكيله على هيئة أصابع متساوية بشكل جميل ونقوم بوضعها فى صينية، وندخلها الفرن على درجة حرارة 200 لمدة 20 دقيقة وتخرجها من الفرن ونقوم بتقديمها وهى ساخنة مع السلطات المختلفة .. الطحينة والمخلل .. وبالهنا والشفا :))

طريقة عمل الكريب - تحضير الكريب - مقادير الكريب , بالخطوات

مساء الفلللل :D كام واحد فينا قبل كده دخل مطعم لقى في المنيو حاجة اسمها كريب ؟؟ 

وكام واحد فينا بياكله على طول أصلا ..

بصراحة هو اختراع رووووعة بيتعمل حادق وحلوو .. ممكن يتحشي أي حاجة تحبيها , أي حاجة تختاريها على زوقك :))

نخش في الموضوع على طووووووول ..

هنعرف مقادير وطريقة تحضير الكريب وكمان هنعرف طريقة تحضير حشوة الشاورمة :D

عشان تحضري الكريب في البيت محتاجة اييه ؟؟

اضغط على الصورة للتكبير ومشاهدتها بالحجم الكامل

مقادير الكريب :

· 60 جم من الطحين (دقيق)

· 30 جم من الكريمة اللباني 

· 10 مل من زيت الذرة

· 5 جم من الملح

· 1 بيضة

· 100 مل من الحليب

طريقة تحضير الكريب :

- ضعي الطحين في طبق واخلطيه مع الحليب والكريمة اللباني والبيض. ممكن تخلطيه بخلاط العجين ده (مش جي اسمه على بالي :D ) لحد ما يبقى في سمك الطحينة تقريبا (سائل مقارنة بالعجين) .

- وبعدين امسحي المقلاة التيفال بمنديل فيه زيت ذرة.

- حطي المقلاة على نار هادية، وبعدين صبي عجينة الكريب لحد لما تبقى يادوب طبقة رقيقة علو وش المقلاة ..

- أول ما تشوفي الكريب بدأ يطلع فقاقيع اقلبيه على وشه التاني عشان يتحمر.

-بعدين اطفي عليه لما الوش التاني يستوي .. وخلي بالك عشان الكريب بيتحرق بسرعة جدا :D 

طيب الكريب جاهز دلوقتي هنحشيه اييه ؟؟

طبعا احشيه على زوقك أي حاجة .. شاورمة, لحمة مفرومة, بطاطس, جبنه , شوكولاته, سكر, عسل أو أي حاجة .. هقولك ازاي نحضر حشوة الشاورمة ..

مقادير الشاورمة :

200 جم من الدجاج

· 20 جم من الملح

· 20 جم من الفلفل

· 40 جم من المخللات

· 30 جم من الطماطم

· 20 جم من البصل

· 20 جم من المايونيز

· 20 جم من معجون الثوم المشوي

· 20 جم من البقدونس

خلطة تتبيلة الشاورمة :

· 60 جم من الليمون

· 30 جم من البهارات

· 20 جم من الملح

· 10 جم الثوم

· 20 مل من زيت الزيتون

طريقة تحضير شاورمة الكريب :

- اخلطي الليمون في طبق مع زيت الزيتون والثوم وخليط البهارات، وبعدين حطي شرائح الدجاج في الخليط عشان يتتبل.

- شوحي الدجاج على النار لحد اما يستوي وياخد لون التحمير، حطي عليه بقى البصل والطماطم والبقدونس وشيليه من على النار.

للتقديم :

- اخلط المايونيز مع معجون الثوم المشوي، وافرديه على سطح الكريب.

- حطي كمية كبيرة من الشاورمة على الكريب وشوية مخلل، وبعدين لفي الكريب. وبالهنا والشفا :))

تعلمي أروع طريقة لتحضير كبسة الدجاج أو اللحم خطوة بخطوة

الكبسة يعني أشهر أكلة من المطبخ الخليجي .. الكبسة يعني رز وفراااخ :D .. ندخل في الموضوع على طول ..

لعشاق كبسة الدجاج أو اللحم اللذيذة .. المقادير :

3 كبايات أرز كبسة او بسمتي ,
6 معالق كبيرة سمن أو زيت ,
3 وحدات كبيرة بصل هنقطعها شرائح رقيقة ,
1 كيلو أو أكثر دجاج ( فراخ) أو لحم مقطع 8 قطع (كل ربع قطعتين) ,
3 طماطم كبارمتقشرين أو مفرومين ..
1/4 كباية معجون طماطم ,
حبتين لومي مجفف ,
6-8 فصوص هيل (حبهان) ,
عودين قرفة و 4 فصوص قرنفل وورقتين غار وكمان نحط 6 حبات فلفل أسود مش مطحون , معلقة صغيرة ملح ومعلقة صغيرة ملح ناعم ..

طريقة التحضير :

1) اغسلي الأرز وأنقعيه في ماء دافية لمدة 40 دقيقة.
2) هاتي القدر (حلة) متوسط الحجم، حطي السمن أو الزيت، سخني على نار قوية، ضيفي فيه البصل، وقلبيه على النار كويس لحد لما يبقى لونه دهبي . وبعدين شيلي البصل وحطيه على جنب .. (وشيلي نصه عشان هنستخدمه في تزيين الطبق في الآخر).

3) حطي قطع الدجاج (الفراخ) أو اللحم على نفس الزيت اللي في القدر (الحلة)، قلبيها على نار قوية لمدة 4-5 دقيقة لحد لما يبقى لونه دهبي .

اضغط على الصورة للتكبير ومشاهدتها بالحجم الكامل

4) ضيفي نصف مقدار البصل المحمر، الطماطم المفروم، معجون الطماطم، و4 كبايات ماء، ضيفي اللومي، الهيل والقرفة.
5) غطي القدر (الحلة) وسيبيها على نار هادية حوالي 40 دقيقة لحد الفراخ ما تستوي.

6) زودي بهارات الكبسة، قلبيها كويس مع الدجاج أو اللحم.
7) صفي الأرز من الميه اللي نقعناه فيه، وحطيه على الدجاج (الفراخ) أو اللحم من فوق، وقلبي بالراحة .. لازم تكون الشوربة (المرق) حوالي 1سم فوق الأرز، وزودي شوربة كل ما تحتاج واتأكدي من الملح دوقيه كل شوية ..
8) سيبي القدر (الحلة)على نار قوية لحد لما يغلي جدا لمدة 2-3 دقايق لحد اما يشرب الشوربة ..9) غطي القدر وسيبيه على نار هادية جداً .. حوالي 40 دقيقة لحد أما يستوي بقى ..

10) حطي الكبسة بقى في طبق ووزعي البصل المحمر الباقي عالوش هيديه شكل جميل .. وبالهنا والشفا :))

ممكن :

* لو عايزة طعم لومي قوي ،، اغرزي طرف السكينة في حبة اللومي اخرميها قبل استعمالها،، ده هيزود طلوع النكهة الحامضة والقوية مع الطبخ.

* بهارات الكبسة هي عبارة عن خلطة من البهارات المطحونة  بتتوفر دايما عند العطار.

طريقة عمل لقمة القاضي - خطوات تحضير (الزلابية - العوامة)

لقمة القاضي .. أو الزلابية .. أو أي اسم انتي تحبيه :D

أكله خفيفة ولذيذة مشهورين بيها المصريين والسوريين .. وسهلة جدا تعمليها في البيت ومكوناتها متوفرة في أي بيت :))

لقمة القاضي (الزلابية) تحضيرها مبياخدش منك نص ساعة .. وبتتقلي في الزيت في أقل من خمس دقايق .. يعني كمان مش بتاخد منك وقت ..

هنحتاج ربع كيلو دقيق .. ويا ريت لو تنخليه بالمنخل كويس عشان ميبقاش فيه كور عجين كده .. ونحط عليهم : معلقة صغيرة خميرة , معلقة كبيرة سكر , رشة بيكنج باودر , معلقة صغيرة نشاء , نص معلقة ملح صغيرة , ونحط عليهم كباية ميه دافيه (طبعا العجين لما هنعمله مش هيكون متماسك زي عجينة البيتزا أو الحلويات .. هيكون شبه سائل)  .

الخليط ده هنضربه بالخلاط لحد لما يبقى متجانس جدا .. وبعدين نحطه في طبق غويط ونغطيه بخلقه مبلوله على خفيف ونسيبه يتخمر في وسط دافي شويه .. لمدة ساعة كفاية أوي . عشان نستغل الوقت نقدر نجهز الشربات لحد لما تخمر العجينة (ممكن نستعمل العسل أو السكر المطحون مكان الشربات) .. الشربات عبارة عن كبايتين سكر وكباية ميه ونص لمونه وممكن ترشي عليها شوية فانيليا :)) هتحطيهم في قدر (حله) عالنار وتقلبيها كويس وتسيبيها تغلي لحد لما تبقى تخينه (قوامها زي العسل كده) ..

اضغط على الصورة للتكبير ومشاهدتها بالحجم الكامل

تسوي لقمة القاضي (الزلابية) ازاي بقى ؟؟!

أولا هتحطي الزيت عالنار لجد لما يغلي وبعدين نهدي النار عليه .. وهيكون فيه جنبك طبق صغير حاطين فيه شوية زيت عشان نبل بيهم المعلقة كل شوية واحنا شغالين .. هنمسك المعلقة باليد اليمنى ونمسك جزء من العجينة باليد اليسرى .. هنقفل على العجينة بقبضة اليد ونغرف اللي طلع على شكل كور بالمعلقة ونحطهم في الزيت .. 

وتستمري في التقليب لمدة خمس دقايق تقريبا لحد لما تبدأ تستوي وبعديت هتعلي النار على الزيت شوية عشان نحمر لقمة القاضي بقى ونديها الوش الدهبي :D .. مش هتاخد دقيقتين واحنا مستمرين في التقليب .. بعدين نشيلها من الزيت ونحطها على مناديل عشان تشرب منها الزيت ..

بعدين هتاخدي لقمة القاضي (الزلابية) وتضيفيلها اللمسة الأخيرة بقى :)) .. تغرقيها في الشربات اللي عملناها من شوية .. أو ترشي عليها عسل أو سكر .. وبالهنا والشفا :))

طرق تحضير جميع أنواع القهوة - النسكافيه - الكابوتشينو

طبعا كلنا عارفين إن القهوة بجميع أصنافها هي من أكتر المشروبات انتشارا على مستوى العالم ..

وكلنا شربنا القهوة سواء سادة أو عربي أو تركي أو نسكافيه أو كابوتشينو .. إلخ

أنا نفسي مقدرش أروح كليتي الصبح بدري إلا لما أشرب نسكافيه ! :D ..

طيب نعمل القهوة بقى بكل أنواعها ازااااي في البيت ؟!!

*) طريقة تحضير القهوة السادة : هتغلي لتر ميه .. وبعين هتجيبي فنجانين قهوة فاتحة من النوع المحمص أوي وتحطيهم في الميه وتستنيها تغلي تاني لحد لما ينزل التفل (القهوة المطحونة) في القعر .. ممكن كمان تغليها أكتر من مره عشان تركزي الطعم أكتر ..

*) طريقة تحضير القهوة التركية : مبدئيا .. القهوة التركي بتبقى متومسطة التحميص ومطحونة جدا (ناعمة) وبيتحطلها حبهان (هيل) مطحون .. هتحضريها ازاااي ؟ هتجيبي فنجانين ميه وتحطي عليهم معلقة صغيرة سكر " أنا بحط 3-4 معالق ;) " وتحطي معاهم معلقة صغيرة أو اتنين حسب الرغبة من القهوة التركي دي .. وتحطيهم على نار متوسطة الحرارة وتفضلي تقلبي .. بعد لما القهوة تبدأ تغلي هتهدي النار عالآخر وتستنيها تغلي عالهادي لمدة دقيقة .. وتراعي وانتي بتصبيها في الفنجان متضيعيش "الوش" :D

*) طريقة تحضير القهوة العربية : القهوة العربية بتتعمل نفس القهوة السادة مع إضافة الحبهان (الهيل) وسعات زعفران ومياه ورد ..

اضغط على الصورة للتكبير ومشاهدتها بالحجم الكامل

*) طريقة تحضير الكابوتشينو : الكابوتشينو أصلا عبارة عن وصفة إيطالية .. بيتحط فيها نوع معين من القهوة كدة اسمه "اسبرسو" بيتحطلها لبن (حليب) وكريمة مخفوقة اللي بتطلع رغاوي عالوش دي :D .. انتي في البيت بقى هتجيبي مقدار فنجان سكر و فنجانين قهوة اسبريسو و3 فناجيل ميه .. هتضربيهم في الخلاط وتحطيهم زي مهما في الكباية .. وتحطي عليهم معلقة رغوة .. وبعدين تغلي الحليب وتصبيه عليهم في الكباية من ارتفاع صغير عشان متضيعيش الرغوة :D .. ممكن ترشي عليها مكسرات ..

*) طريقة تحضير النسكافيه : شبه الكابوتشينو بس أسهل ومن غير كريمة :)) .. تغلي كباية لبن وتحطي عليها معلقة نسكافيه (أو كاكاو) و 3 معالق سكر .. وبالهنا والشفا :))

أسهل وأروع طريقة لتحضير الفراخ " الدجاج " المشوية في المنزل

السلام عليكم ورحمة الله وبركاته

النهاردة أول تدوينة ليا .. هشرح فيها طريقة تحضير حاجة مميزة جدا ..

ومين فينا مبيحبش الفراخ المشوية ؟! :D

وعلى فكرة مش هنتكلف نشتري حاجة جديدة .. كل احتياجاتنا موجودة في أي بيت ..

طبعا أول حاجة هتعمليها هتنضفي الفراخ ,, رشي عليها ملح وفلفل وادعكيها كويس جدا .. وبعدين اشطفيها بالميه ..

ممكن كمان لو حابه ترشي عليها دقيق ,, وتفركيها تاني وبعدين تغسليها ..

تاني حاجة .. هتقطعي الفرخة ارباع ,, وأنا عن نفسي بقطع كل ربع حتتين عشان أضمن كل حتة تستوي كويس ..

نسيب الفراخ بقى شوية ونشوف التتبيلة أو الصوص بتاعنا .. هتجيبي بصلتين كبار مع فصين توم وفلفلة رومي واحدة .. تقطعيهم وتضربيهم في الخلاط وترشي عليهم ملح , كمون , كزبرة , رشة قرفة صغيرة , ورشه حبهان (هيل) مطحون صغيرة , رشة شطة حمرا , وتعصري عليهم نص لمونة :)) .. مممكن لو حابة كمان ترشي شوية زعتر بيدي طعم حلو في الشوي .

اضغط على الصورة للتكبير ومشاهدتها بالحجم الكامل 

هنسويها ازاي بقى ؟؟
هتجيبي صينية وتحطي نقطتين زيت وتحطي فيها التتبيلة دي .. وكمان تحطي الفراخ وتتأكدي ان الفراخ كلها اتبلت .. وتحطي عليهم ربع كباية ميه وتحطيها على النار (البيوتاجاز من فوق) لمدة ساعة إلا ربع .. بس خلي بالك تقلبيها كل عشر دقايق وتزوديها شوية ميه كمان عشان متلزقش أو متتحرقش .. لحد أما تلاقي الفراخ استوت ..
آخر خطوة بقى عشان تديها الشكل المشوي .. تنزلي الصينية في الشواية يدوب لمدة خمس دقايق عشان تحمري وش الفراخ ووش الصوص ..

دوقيها وادعيلي بقى .. بالهنا والشفا :))